نشر الفنان محمد رمضان، على حساباته المختلفة بمواقع التواصل الاجتماعي، مقطع فيديو له، ظهر فيه وهو يكشف تفاصيل صفعه أحد معجبيه خلال تجوله في إحدى قرى الساحل الشمالي، موجهًا اعتذاره لأهل الشاب.
وقال رمضان في الفيديو: “الجمهور العدل الأصيل الغالي ألف شكر وربنا ما يحرمنيش منكم على وقفتكم معايا ومساندكم، وقرأت وسمعت قد إيه دافعتم عني وغلطتم الولد الصغير، ولكن أنا عملت الفيديو ده علشان أعترف بخطئي وأعتذر لأهل الولد الصغير، إني إيدي اتمدت عليه وأنا عارف إنه عيل صغير”.
وأضاف: “لما غلط في الأول قلعته الكاب وبصيت في وشه لقيت إنه صغير وقلت له اسمك إيه ولما رجع غلط تاني لفيت وقلت له هات التليفون خباه، وما تملكتش نفسي وضربته قلم بسيط والقلم البسيط ده طير له الكاب والنضارة، ولو نعتبر أن الناموسة اللي وقفت على خدي قلم فأنا أستاهل خمسة لأني مديت إيدي على عيل صغير ودي لا رجولة ولا بطولة”.
وأكمل: “وأنا ما تمالكتش نفسي لما خدت تليفونه ومسحت الفيديو وحد قال لي اكسر له تليفونه علشان ما يعملش كده تاني، قلت له لو هو غلط أبوه وأمه ذنبهم إيه يجيبوا له تليفون تاني، خاصة لما عرفت إنه من قرية تانية، وقلت لهم روّحوه، والأمن قال اعمل له محضر قلت لهم لا يروح بعد إذنكم”.
وكانت حالة من الجدل قد أصابت مواقع التواصل الاجتماعي بعد انتشار مقطع فيديو ظهر فيه محمد رمضان وهو يصفع أحد معجبيه ويعتدي عليه، وفي المقابل رد له الشاب تلك الصفعة في لحظتها، وذلك خلال تجوله في إحدى قرى الساحل الشمالي بعد إحيائه حفلًا هناك.
